by 出了院，多謝各位朋友關心…
入院其實係因為流鼻血，同埋黑畫面呢次咁恐佈的經歷之後，自己、家人同朋友都不約而同的都浮起要檢查吓的念頭。因為無端端流鼻血實在係可大可小，我唔敢搵自己去搏…因為我無咩橫財命，搏呢家嘢…唔啱我
於是在黑畫面之後的第二日去咗睇醫生，點知….
由媽媽細個睇到我大個的那個醫生，竟然唔肯寫封reference letter我入院做檢查！
…拜托，我不是叫你去同我做檢查，你唔得嘅，你refer我去咪得囉！徙晒我啲時間，頂！
結果我直接去咗醫院門診，我好中意佢哋的態度，雖然係教會醫院，但係擁有100%傳統孔子思想：有 教 救無類——只要你有錢就得喇
（註：想當年，孔Sir只要你有束脩〔=臘肉〕就會教你，話之你係古惑仔定係國家主席）
好在因為有人發明咗保險，我唔需要突然批出一批大額款項，但係因為Claim保險我一定要瞓一晚醫院，所以…就要入院先做得檢查…拿，促進社會繁榮就係靠呢啲無厘啦更的消費喇…做咩要無啦啦入醫院先得架？貪醫院香定係嫌錢腥呢？
Anyway，我都係入咗醫院，三人房但係除咗我得一個中坑住，仲有私家獨立LCD電視同埋Wifi咁話
……設備隨時好過好多酒店…除咗係同一個(?)唔識的人share房之外
有帶電腦、iPhone做電話同埋thethering、仲有漫畫一本…原本想買多點，但係唔記得本新的買咗未，決定遲啲先…
用iPhone thethering的速度唔錯，如果我齋用web同msn等application的話，macbook同iPhone的電都夠撐一晚唔需要叉電
但係半路中途有人嚟抽血…咦？驗血唔係要空肚先抽得嘅咩？….算，你哋話得就得，我唔係專家
再夜少少有姑娘貼嘢提醒要做MRI
然後十點幾瞓覺…可惡，瞓唔到，但係十一點幾有人拍拍我量血壓…量完之後成晚都瞓唔到 = =”
戴住iPod瞓都唔得…點幾兩點喇
呢個時候外面燈火通明，我對面有一個床位，入院嗰陣明明係吉的，但係嗰邊做咩無啦啦著咗燈仲鬼殺咁嘈（我聽緊iPod，只係聽到好嘈唔知咩事），明明係教會醫院都會咁猛？唔係掛=.=
原來係有人半夜三更入醫院！我頂！你好入唔入做咩要入我ward啫！間醫院咁大，我死唔信得返我呢度一張床…..
妖，隔離個大叔爺已經喺度猛咁放氣，個枕頭又矮又硬…但係床褥又軟林林到不得了，簡直絕過黑白配！
於是我諗我應該四五點先瞓得著，但係七點半又俾姑娘刮起身量BP…我瞓都未瞓救，BP梗高啦大佬…量完，再瞓過，又瞓唔到喇=.=”，跟手過咗無耐就俾人夾咗去做ultrasound，即時 驗孕 檢查即知結果，結果係除了一些醫生說是小毛病但係講出嚟會嚇死你的 symptoms 之外，乜都冇事…
又隔了一陣，今次俾人夾去做MRI磁力共振，我以為係一舊會出wave的大磁石，點知啲wave有好多都係人類可聽的…除了可聽得到之外，那些聲音還要是有beat的（大汗）…醫生叫我唔好郁，但係我有啲想打beat喎，點算？仲有部MRI機，….有頭罩的，有啲似劍道咁XD
話咁快又做完~快過燒銀紙…終於可以返床位…聽到對面個「朋友」，原來係澳門人嚟架！我一整個orz掉……..前世得罪過澳門咩我………
叫早餐食，因為唔知出面外賣啲電話，唯有食醫院嘢，雖然全素食但係都好食，係啲腸粉擺得耐，起「鋼」呀….（不過啊，你能夠期望是好食的嗎？）
然後成日等報告…悶到發荒…之際
上晝有公司電話打嚟，個死肥鬼好話我約佢今日開會但係請假（你又批架喎…），我認，我係唔記得有會開呢回事，但係身體健康同開會我唔會揀開會囉…你中意錢一回事，我要份賠償就夠喇…會呢啲嘢，同你兩老傾完都無結果嘅，我都唔知傾嚟有咩謂…一見面兩公婆只係識得嘈嘈嘈…我真係好想一人星你一巴嘅啫…你阿媽個女吖………
到午飯時間，叫咗個炒飯同茄蛋，味道還好但是體積…….
算吧。
四點左右，醫生登場，解釋報告（即做即有…真係勁），結果就係：細路，你無事喎
搞出院都要成個鐘…找埋條尾數，然後閃人~落返城市第一時間去咗粥檔——整咗條新鮮炸起嘅牛脷酥！！正爆呀！三爬兩撥就KO咗，然後拿拿聲搭車返屋企，入院記完！
