喪爆《MK 字典》
香港大把旺區,但就未聽過有「銅鑼系文化」、亦冇「尖嘴仔」呢啲名詞出現。唯獨旺角就出咗「旺角系」,更有一群「MK
仔」,著衫零舍有個性,連講嘢都夾雜一系列爆笑用詞。呢類詞語冇解釋,但聽落又好鬼易明!今次就搵嚟MK 仔女徹底演繹一系列MK
語言,等你唔使親身「炸」落旺角「花街」,都可以「激喪」了解勁「爆」嘅MK 文化!
記者:馬慶武
攝影:伍慶泉
例句真人示範
■喂!又話出MK 「Hea 」?我已經到咗「菜街」口喇喎!
■我依家「炸」緊落嚟,唔係等我一陣都要「Yo 」我吓嘩!
■個肚「喪」餓,去邊度「Lam 飯」先?
■「Lam 」完去「篤嘢」囉!
■畀本「古惑仔4」吖唔該。
旺角系常用詞解釋
喪、激 非常
爆 突出
炸 趕快地
Yo 寸
界 媾
Lam飯 食飯
篤嘢 打機
唱正K 去唱卡拉OK
唱邪K 去夜總會唱卡拉OK
花街 花園街
菜街 西洋菜街
潮特 潮流特區
古惑仔1 星期一出版之《古惑仔》
古惑仔4 星期四出版之《古惑仔》
《壹本便利》創典鼻祖
■哈囉文:其實旺角系用語唔係我哋發明嘅!
主持哈囉文:「成日蒲旺角,訪問旺角友,呢啲旺角系用語都係從訪問過程中得知嘅,好似『界』『裂』『喪』咁啦,加上咁多傳媒翻用,咪愈煲愈紅囉!我哋只係將呢啲詞語發揚光大,等多啲人識咁解啫。」
MK 友投票最經典:界
記者街頭訪問咗超過20個MK 友,問吓邊個係最經典的MK 字,有13人揀「界」字,以大比數勝出!其他如「激」、「爆」、「喪」各有支持者。
Cherry :「依家都冇人講『媾女』呢個詞語,全部轉晒做『界』女,梗係夠經典啦!」
Rosita :「我就覺得『激』字最正,能夠表達到嗰種好勁嘅意思,我都成日用。」
Terry :「『界』字係我聽到嘅第一個MK 字,梗係最經典啦,不過MK 話都幾老土!」
波鞋街:登四嚟喇!
■(左)試完廿對鞋都冇對啱,正一『腌四』。(右)哦!你話我麻煩?唔好以為我唔識聽!
除咗一般MK 用詞,旺角波鞋街「花街」重有專用術語,全條波鞋街Sales 冇一不曉,消費者學番一兩句,就唔會俾人老點。
Size :孖二
1:丁
2:元
3:王
4:叉
5:仔
6:共
7:廿
8:分
9:尤
10:平
半碼:仔
冇:M
最大Size :頂粗
招呼客人:登攏
拎同一對鞋畀客試:翻張
試完唔買鞋嘅人:水
麻煩嘅客人:腌四
Display 鞋:色紙
打折頭:計
靚女:登四
好景:4樓有4仔!
事先聲明,唔係鼓勵大家買翻版,只係旺角好多商場都有唔同叫賣口號,無厘頭得嚟勁有「蝦仔嗲哋」Feel ,好爆笑!
男嘅夠搏,女嘅夠索。
難得開到舖,買番3、4套。
冇格4級,化痰止咳。
一百蚊4隻,愈睇愈大隻。
4仔看門口,老師都會走。
睇得4仔多,女友冇囉囌。
■好景4仔阿叔絕對係地標,一句「4樓有4仔」更係旺角經典,不過拍攝當日見到新4叔新作風,唔再嗌口號,改揸漫畫改裝而成嘅宣傳牌,實行一招「無聲勝有聲」。
解構MK Look
■黑色恤衫扣少兩粒鈕露心口已經好MK ,最嚴重係呢條閃晒嘅龍,MK 到爆!
■一頭金髮係MK 標誌,如果唔係Highlight ,再加埋有新生黑色頭髮襯底,咁就無敵喇!
■女仔著窄身喱士衫已經出賣咗佢MK 女的身份。留意!大喇叭褲腳MK 得好Classic 。
旺角喪爆位
■旺角百老匯戲院門口一段路,未係行人專用時段會泊滿貨Van ,而且貨Van 特別鍾意炸機,MK 仔女隨時聞歌起舞!
同場加映!解讀Hip Hop 手勢
Hip Hop 組合「農夫」C 君親身示範:「呢啲手勢多數係Rapper 嘅身份象徵,不過有啲手勢就具爭議性,唔可以亂做㗎!」
■同右圖兩個都代表Western 的W字!
■呢個唔係Hip Hop 手勢,C 君話由Beyond 時代開始呢個和平手勢最Hit 。
■反轉和平手勢即反基督、支持魔鬼。食指尾指係魔鬼對角,拇指係魔鬼條尾。
■七八十年代美國東西岸Rapper 對立,呢個動作就係表明自己係東岸Rapper 。
■呢個係東岸手勢,C 君話手勢係代表Eastern 嘅E 字喎!
■美國Rapper Jayz 常用手勢,傳聞係一個邪教組織手勢,一般人唔好亂做。
這是轉載的,還有
小朋友千萬不要學XDDD
你呢個"report"真係到肉啊,連我呢個馬來西亞人都已經對mk明解明解!!!