16/04/2021

越走越遠

昨晚很夜睡,原本儲起的精力一晚耗盡了
所以今天原本想一整天都躲在家的,不過昨天應承了將在日本儲了的東西分好給友人,所以一定要出門口
昨晚因為沒有在家吃飯,今早的早餐就是昨晚的晚飯
原來是臘腸蒸雞,臘腸經過微波爐的烘焗(?)之後,變得更脆更好味(笑)

不過
今朝買餸返來…我見咁好餸,又有瑤柱節瓜脯,又有炆冬菇,真係團年都冇咁好餸
我以為特登為我煮的
點知唔問由自可,一問真係萬把幾火
『你細佬女朋友上嚟食飯嘛』

我………………我比唔上一個未來新抱!!
你對咗廿幾年個親生仔,都比唔上一個你見過十幾次的一個女仔!
喺日本一返來我以為有餐阿媽靚飯食,點知係叉飯!!!!!
細佬每次話帶女友返來食,你就大魚大肉!
仲要買完再落去買多條魚….!
又話攰嘅?買完魚有排整架喎!

又次次都食唔晒,剩返晒喺度,大佬,你煮都要時間精神架?
啲時間花啲俾我好唔好呀?
拜托,又唔係第一次,駛唔駛舖舖都係咁呀?

係你覺得我去旅行返嚟好好玩,唔會想掛住你啲餸呢?
定係你覺得呢個仔已經可有可無呀?如果係我係咪可以唔俾家用呀?

吃飽昨晚的晚飯(即係早飯),要到我出聲,阿媽先肯睇我啲旅行相
係咪唔叫,你就唔理個仔呢?
睇睇下,又話洗衣機洗完衫要拿去乾衣機
然後又話水滾又盛咁,我講到好冇癮呀你知唔知?(梗係唔知啦,你都唔睇)
就係咁樣停吓睇吓,求其睇完就算

下晝將未打好的日記打完,看看動畫…
感覺很像很久違,不過好像也只是2話..?但是總覺得中間好像沒看過一樣
張檯還是亂到七彩,但係原全沒心機去執
想打文,突然blog就掛掉了
然後同一時間收到兩個怒之sms

真的即刻想掘套EVA出來再看一次…

晚上未夠鐘,去了書局打書釘
不過我應該是個不合格的書釘友,很多時我會連書帶返歸(買咗)

給了東西友人,然後友人說肚餓所以一起去了吃手打烏冬
這店開了很久但是我還是第一次去吃

茄湯蒜香雞絲烏冬(名字可能有出入)
番茄湯底勁好味!烏冬煙韌彈牙
價錢又抵,這間應該都會成為我愛店
下次可以試下佢另一個主打二十榖米飯…..不過可能冇烏冬咁好食

一路食一路分享下趣聞,時間原來很快過
一想到回家心情會不好,就記得阿b找我出去飲嘢
講下笑下就十一點,回家打了這篇文都兩點了

這兩日的假期就這樣完結

8 thoughts on “越走越遠

  1. 這個烏冬.. 好吸引啊, 叔叔帶我去吃吃 (扯衫尾

Comments are closed.